Trainingsweekend Futures Kader in Tenero/TI vom 17.- 19.11.2017
Tagebuch
Fritig, 17.11.2017
Am Fritignomitag eschs ändlech sowiit gsi ond die einte händ sech in Zug, die andere in Lozärn besammled. Ab Arth Goldau send mer nochhär als gsamte Futurekader onderwägs gsi. Zom Glöck händ mer resvervierti Plätz gha, so dass mer bequem händ dörfe uf Tenero reise. D`Reis esch sowiit guet gange, bes öpper de Rucksack in Tenero im Zug hed lo legge. Zom Glöck esch de Zug chorzi Zyt spöter retour cho, so dass mer denn doch no met allem Gepäck guet im Centro sportivo aacho send. Nochdem alli Zimmer bezoge gsi send, send mer scho serscht mol go Sport mache. Nochemene spielerische iiwärme uf de Gallerie, well d Halle nonig frei gsi esch, händ mer en Einheit Rumpfchraftüebige met de Blackroll gmacht. Gar ned so eifach gsi uf dere gwagglige Rolle. Mer händ üüs asschliessend dörfe i drüü Experteteams inere spielerische Stafette öber Alkohol, Cannabis ond Tabak schlau mache. Ned alli Begriff send klar iizordne gsi, händs aber met Hilf vo de Trainer denn doch no chönne richtig uuflööse. Nochhär esch es wiiter gange i de Turnhalle metere ossergwöhnleche turnerische Stafette. Die letschte 20 minute händ mer no am Reck ond a de Ring turned, üüs als Chlätterer a de Affeschwänz versuecht. Bi de einte oder andere hets rechtig guet uusgseh, anderi händ die erschte Blattere a de Händ becho. S erschte Fritigstraining het so richtig Hunger gä, drom send mer denn froh gsi, dass es no öppis z ässe gäh hed. Nachem ässe send mer no go Dusche und denn esch au scho Zyt gsi zom go schlofe.
Expertteam Cannabis: Flurina, Ronja, Nino, Simon, Matteo, Janis, Janos
Samschtig, 18.11.2017
Tagwach esch am 06:45 gsi am Morge früeh. Am 7:15 send mer go z Morga ässe. Am Morge esch Hürde, Diskus ond Wiitsprung ufem Programm gstande. För die eine esch Diskus wärfe richtig fremd gsi. Gar ned so eifach met de richtige Schrittfolg aber esch lässig gsi das dörfe könnezlehre ond uuszprobiere. Noch dem Morgeprogramm hets öppis feins z`Mittag gäh ond chli Siesta het üüs au guet do. Am Nomitag händ mer drüü Gruppene gmacht. De Sandro het verosse Speer gmacht. De Marco het üüs s`Stab springe nöcher brocht. Die einte händ s erscht mol en Stab i de Finger gha, anderi send scho mol gspronge. Es paar Futures händs Stab springe scho richtig guet im Griff ond möched scho höchi Sprüng über s Gummiseil. D`Jacqueline het met üüs Sprint ond Kugle gmacht. Nochem z`Nacht händ mer üüs nomol troffe. Es Happy Birthday het ned dörfe fähle, d`Noémie het nämlech höt Gebortstag gha. I dene drüü Experteams händ mer je müesse en Vorschlag mache för es eigenes «Cool and clean» – Commitments. De Vorschlag vom Expertetam Cannabis esch eistimmig aagnoh worde. Üüses Commitment esch: CLEAN TO THE WIN! Chli spöter händ mer no en Rundi Ping Pong gspielt ond send müed is Bett.
Expertteam Alkohol: Ilaria, Noémie, Sophia, Dafina, Dimitri, Ricardo, Elis, Jonas
Sonntig, 19.11.2017
De letschti Trainingstag hed aagfange. Z`Morge hets höt am 8:00 gäh. Nochem z`Morge händ mer üüsi Zimmer müesse ruume ond Täsche packe. Am Vormittag händ mer weder i drüü Gruppene trainiert. Ufem Programm esch Hochsprung, Speer oder Kugle gstande. Wöu s Wätter so schön ond warm gsi esch, händ mer uf de Liechtathletikaalag chönne trainiere. Am Nomitag esch entweder Staffle laufe oder Teamcross i de Halle zor Uuswahl gstande. De Teamcross esch fascht eistimmig aagnoh worde. Zom iiwärme händ mer üüs met Badminton spiele im Rundlauf warm gmacht. Nochhär händ mer die ganz grossi San Gottardohalle sälber dörfe en Teamcross Parcour uufstelle, so a la UBS Kids Cup Team, nor es Spüürli schwieriger, länger ond heruusforderner. Vier Teams händ nomol Vollgas gä ond die letschte Reserve usegholt. Esch en lässige coole Abschloss gsi. No es ruhigs Cooldown, ab onder Duschi, bevor dass mer üüs weder uf de Heiwäg gmacht händ.
Expertteam Tabak: Kathrin, Alexandra, Alessia, Sara, Cedric, Luca, Fabio
Text & Photos: Jacqueline Stucki
